Politikerit nuimasut tunualerunarput
Israelimi politikerit nuimasut arlallit tunuartitaalerunarput. Ministeriunerup Ehud Olmertip akilerneqarluni akuersisarsimanerarneqarnera naalagaaffimmi unnerluussisut maanna misissuivigigaat, nutaarsiassaqartitsivoq BBC ilisimatitsivoq.
Aningaaseriviup naalagaaffimmit pigineqartup namminersortunngorsarneqarneranut atatillugu ministeriuneq akilerneqarluni akuersisimaneragaavoq.
Naalagaaffimmi unnerluussisoq maanna misissuisitsivoq, politiilli akuliutsinneqanngillat, Ehud Olmertilu aamma suli unnerluunneqanngilaq.
Israelimi politikerit nuimasut misissuivigineqartut arlalissuupput, maannalu tassa ministeriuneq tullinnguussimavoq. Præsident Moshe Katsav pinngitsaaliilluni arnerisarsimasutut kinguaassiuutitigullu kanngunarsaasarsimasutut sapaatip akunnera kingulleq pisortatigoortumik unnerluutigineqarpoq – inatsisinillu atortitsinermut ministeriusimasoq, taavalu avatangiisit pillugit aamma ministeriusimasoq naalagaaffimmi atorfimminni atornerluisimasutut eqqartuussassanngortinneqarlutik.
Sverigimi ministeriuneq avatangiisiminut qiviaruni eqqarsanngitsoornavianngilaq akiliinngitsoortarsimanini ajorpallaanngitsoq.
