Niisa Trawl A/S-ip kilisaataataata Regina C-p, politiinit misissueqqissaarfigineqarnera kinguneqanngitsoorpoq.
Umiarsuup ingerlaarfiinik nalunaarsuivik bagmandspolitiinit misissoqqissaarneqareersorlu tamanna paasinarsivoq.
Raajat 384 tonsit pisarineqarsimasutut nalunaarsuivimmi allattorsimasuutigineqarput, naak pisarineqarsimasut 370 tonsiinnaasut paasineqaraluartoq. Tamanna inatsisinik unioqqutitsinerunngilaq, pisassarititaasunullu taamaallaat sunniuteqarsinnaalluni.
Bagmandspolitiini politikommissæri Svend-Erik Jensen ataatsimeeqatigereerlugu Niisa trawl A/S taama ilisimatitsivoq.
Misissuereernerup kingorna nalunaarusiornermi kukkusoqarsimasoq paasineqarpoq, bagmandspolitiillu kukkusimanertik ajuusaarutigaat, naqinnerliuisoqarsimasutullu nalilerlugu.
Naqinnerliuinerli inunnut ataasiakkaanut eqquisimavoq. Niisa Trawl A/S-ip piginnittua, Svend Christensen, oqarpoq pisimasoq pillugu nuanniilliorsimaqalutik:
- Nuanniilliortitaasimaqaagut. Inuit siarnguttorsuusimapput, ingamillu nuliannut nuannerpallaarsimanani, Svend Christensen oqarpoq.
Kilisaat Regina C septembarip ulluisa 13-ianni Nuup umiarsualivianit aallatsaaliorneqarpoq, bagmandspolitiinillu misissueqqissaarfigineqarluni.
Niisa Trawl A/S-ip politiinit misissuiffigineqarnerata suliarineqarnera sapaatit akunneri marluk ingerlanerini naammassineqarsinnaajumaartoq politiit nalunaarutigaat.