Korea Avannarlermiut atom-i atorlugu misileraallutik qaartitsisaqattaarniarlutik Kinamiunut nalunaaruteqarsimasut amerikamiunit nalunaarutigineqarpoq, tamannali Korea Kujallermi nunanut allanut ministerip tullersortaanit ilumuunnginnerarneqarpoq.
Amerikami atorfillit kinaassutsiminnik isertuussisut amerikamiut TV-eqarfiannut NBC-imut ippassaq taama oqaluttuarput. TV-eqarfiup taassuma ippassaani nalunaarutigaa amerikamiut satellit atorlugu isertortumik paasiniaassutaata Korea Avannarlermi atom-i atorlugu misileraalluni qaartitsiviusimasup nalaani sakkussanik assartuisoqartoq takuneqarsinnaasimasoq.
- Taamatut nalunaarneq tunngavissaqanngilaq. Kina taamatut nalunaarfigineqarsimanngilaq, Korea Kujallermi nunanut allanut ministerip tullersortaa taama oqarpoq.
Kinamiilli tamanna pillugu oqaaseqartoqanngilaq.