Timmiaq alutorsaatigineqarpoq
Danmarkimi qeqertaq timmiaqarluartartoq Mandø timmiarsiuunik ulikkaavippoq, timmiaq qarluumasoq Danmarkimi siullerpaamik takuneqareersorlu. Tassa ippassaq Mandøp illoqarfiata avatinnguani timmiaq takuneqarsimavoq. Timmiaq qarluumasoq Canada-meersuunngikkuni Alaska-meersuuvoq ukiuuneranilu Amerikami Kujallermi ukiisussaagaluarpoq, kisiannili tassa massakkut Mandømut pisimavoq, Morten Benson Ornitologisk Foreningimeersoq oqaluttuarpoq.
- Qarluumasunnguaq taanna Amerikameersoq Europami taamaallaat arlaleriaannarluni siornatigut takuneqartarsimavoq.
Ullaap tungaa qulit eqqaani takuneqaqqaarpoq, takunneqqaartulli suunersoq nalugamiuk allanut oqaatiginngilaa. Aatsaat nalunaaquttap akunneri arlallit qaangiuttut takoqqikkamiuk allanut oqaatigimmagu nuna tamakkerlugu takuniaasunik takkuttoqartalerpoq, allaat ataaseq takuniaalluni Skagenimiit taxarluni takkuppoq.
Taassumali Skagenimeersup sila taarsisoorlugu timmiaq takunngitsoorpaa, kisianni qeqertami unnuiniarpoq neriuutigalugulu aqagu qaammariarpat takusinnaassallugu.
Tassami neriuutigineqarpoq sila allanngussanngippat ulluni tulliuttuni timmiaq takuneqarsinnaassasoq. Morten Benson Hansen DR-imut taama oqarpoq.
