Igasorsuaq INUILI-mut tikeraalerpoq
Nunatsinni igasut arfineq-aappassaannik sapaatip-akunnerata naanerani unammilerpata franskeq igasoq nunarsuarmi tusaamasaq, Michel Michaud, tikeraassaaq. Inuussutissalerinermik Ilinniarfiup INUILI-p tikeraarnissaq sulissutigisimavaa.
Michel Michaud-p tikeraarsarneqarnera oqittuaraasimasoq inuussutissalerinermi pisortaq Esben Toftdahl oqaluttuarpoq:
- Igasoqatai siornatigut nunatsinniissimasut igaassat soqutiginassusaannik oqaluttuartarsimapput, taamaattumik aperigatsinni erngerluni akuersisimavoq, Esben Toftdahl oqarpoq.
Igasut unamminissaat sapaatip-akunnera sioqqullugu peqataasussat iganermik pikkorissartissavai, INUILI-milu kalaallit igasunngorniartut igariaatsinik nutaanik pikkorissartissallugit.
Michel Michaud Frankrigimi neriniartarfimmik ukiorpaaluit matuma siorna ingerlatsisimavoq. Taamanikkullu Michel Michaud nerisassiullammattut ilitsersuisarpoq. 1971-imi Danmarkimut nuuppoq. Taamanimiilli neriniartarfinni nuimasuuni, soorlu Falsled Kro, Kong Hans aamma Søllerød Kro igasutut sulilluni.
Danmarkimi igasoqatiminit siorna akissarsitinneqarpoq, akissarsiaralugu ”Kokkenes Kok”.