Piumasaqaatit annikillisarneqarput
OL-imi unamminerni peqataasut 90-iugaangata peqataasut nunatsinneersut pitsaanerpaat 30-t akornanniittarnissaannut piumasaqaat taamaatinneqarmat, Kalaallit Nunaanni timersortartut OL-imut peqataasalernissamut periarfissaat annertunerulerput.
Kalaallit Nunaanni Timersoqatigiit Kattuffiata, GIF-ip, Danmarkimilu timersoqatigiit kattuffiata, DIF-ip, ullumi ataatsimiinneratigut tamanna anguneqarpoq.
Kalaallit timersortartut amerlanerusut ukiuunerani OL-ertunut peqataasarsinnaanissaannut GIF-ip siunnersuutaa akuerineqarpoq – nunatsinniillu peqataasunut atuutiinnarani naalagaaffeqatigiinnerup iluani atuutsinneqarpoq.
- Danmarkimi politikerit peqatigalugit aaqqiisoqarnera iluaraara, Kalaallit Nunaanni Timersoqatigiit Kattuffiata siulittaasua Nuka Kleemann nutaarsiassaqartitsivinnut allagaqaateqarnermini allappoq, nangillunilu:
- Nunatsinniit OL-imut peqataasinnaasut amerlatsinerat isumalluarnarpoq, ataatsimiinnermilu peqataasut ajunngisaartorujussuupput, Danmarkimilu timersoqatigiit annertunerusumik suleqatigineqalernissaannut ammaassivoq, Nuka Kleemann naggasiivoq.