Nunatsinni erngunnersuaqarsimavoq
Ilulissani angut 23-nik ukiulik sapaatit akunnerini sisamani politiinit tigummineqartussanngortinneqarpoq angummik 24-nik ukiulimmik imerniartarfiup silataani sakkortuumik persuttaasimanini pissutigalugu.
Angut 24-nik ukiulik alleruiarneqarpoq, pinasuartumillu Nuummi Dronning Ingridip Napparsimmavissuanut aallarunneqarluni, angutilli inuunera navianartorsiunngitsoq Ilulissani politiit ilismatitsipput. Angutip persuttaasup pineqaatissinneqarsimasunut inissiisarfimmiittussanngortinneqarnissaanik Ilulissani politiit innersuussuteqarniarput.
Nanortalimmi aamma pisoqangaatsiarsimavoq.
Nanortallip nunaqarfiisa ilaanni Narsarmiuni arnaq inooqatiminit angummit sakkortuumik persuttarneqarsimasoq Nanortalimmi napparsimmavimmut unitsinneqarpoq, arnap sisamanngornerup tallimanngornerullu akornanni unnuakkut persuttarneqartup kiinaani saarngit najungasuilu napineqarsimapput, arnalli inuunera navianartorsiunngitsoq Nanortalimmi politiit ilisimatitsipput. Arnap taama pineqarnini politiinut suliassanngortissaneraa politiinit paasiniarneqassaaq, tamatuma saniatigut politiit namminneerlutik suliassanngortitsisinnaanertik aamma misissussagaat, Nanortalimmi politiit pisortaat Torben Klose oqarpoq.
Narsarmiuni arnaq tallimanngormat unnuakkut erngunnerup nalaani artuleqqatilluni atoqagineqarsimasorisoq politiinut saaffiginnippoq, suliarlu maanna politiinit mississorneqassasoq Nanortalimmi politiit ilisimatitsipput.
Radioavisimit sinerissami politeeqarfinnut paasiniaanitsinni malunnarpoq sinerissami tamangajammi sapaatip akunnerata naanerani ernnguttut annertuumik ajornartorsiortitsisimasut.
