Canadap issittortaani Inuit inooriaasaat misissorneqarsimavoq, issittumilu najugallit inuunermi atugaat Saudi Arabiamiut Brasiliamiullu inooriaasaannut sanilliunneqarsinnaapput.
Indianerinut tunngassutilinnut ministereqarfimmeersoq Dan Beavon, misissuisitsisimasorlu, aviisimut Toronto Star-imut taama oqarpoq.
2001-imi misissuinermi kisitsisit tunngavigalugit 2003-mi taanna aamma saqqummersitsivoq, taamanikkullu inernerineqartut ullumimut assingusut Dan Beavon-ip oqaatigaa.
Isertitat annertussusaat, najugaqarneq, ilinniarsimassuseq suliffeqarnerlu maannakkut misissuinermi misissorneqarsimapput.
Canadami nunap immikkoortortaani sisamani, tassa Northwest Territories-ip avannamut kangisissortaani, Nunavummi, Nunavimmilu nunaqarfiit, Labradorimilu Innu-t nunaqarfii misissuiffigineqarsimapput. Nunaqarfiit katillugit 51-it misissuiffigineqarlutik.