Paavip oqaasii suli qassiiliortitsipput
Paavip aasarsiortarfianut Romap qanittuaniittumut qaaqqusat ilaata, muuamaamik upperisallip katuullit qullersaata muuamaamillu upperisallit aallartitaasa 22-isut oqaloqatigiissimannginnerat tupigusuutigaa. Paavimi oqalugiaannarpoq:
- Upperisaqaqatigiit assigiinngitsorpassuit inuiallu assigiinngitsut imminnut paaseqatigiinniarnerminni oqaloqatigiittarnissaat pingaaruteqarpoq, Paavi nunat tamanit aallartitanut oqalugiarnermini taama oqarpoq.
Indonisiamiut aallartitaata ataatsimiinnerup aaqqissuunneqarnera assut tupigusuutigaa; ataatsimiinnermik taallugu paavip minutsini 30-ini oqalugiareerluni aallartitat assammittaarlugit inersuarmi angalaarpoq.
- Ataasinnguamilluunniit oqaloqatigiinngilagut ataatsimiinnerlu sivikeruttormat tupigusuppugut, Indonesiamiut aallartitaat nutaarsiassaqartitsivimmut BBC-imut oqarpoq.
Paavip nalunaaquttap akunnerata affaata missaani muuamaamik upperisalinnik ataqqinninnini nassuiaatigaa. Naaggaartut muuamaamillu upperisallit persuttaasarnernut suugaluartulluunniit akerliusarnissaata pingaaruteqassusaa paavip aamma erseqqissarpaa.
Paavip sapaatip-akunneri marluk matuma siorna oqalugiarluni muuamaamik upperisallit pillugit kejserip naaggaartup 1400-kkunni oqaaserisimasai issuarmagit muuamaamik upperisallit akornanni perulluliuutaaleraluttuinnarmat ullumikkut ataatsimiinnissaq pilersaarusiorneqarpoq.
Paavip ullumikkut nassuaanera assigiinngitsunik oqalugiarfigineqartunit isumaqarfigineqarpoq. Irakimiut aallartitaa isumaqarpoq suleqatigiiffissanngortoq, Egyptenimiut aallartitaat allarluinnarmik isumaqarpoq;
- Paavi utoqqatserusunngiinnarluni ungaqqutaarivoq, egypteniumiut aallartitaat oqarpoq.
Paavili utoqqatsereerpoq – paavip muuamaamik upperisallit aalaassatsisimallugit utoqqatserpoq. Taamaattorli ukiut 600-t matuma siorna oqaaserineqarsimasut issuarlugit oqaaseqarnini suli utoqqatsissutiginngilaa.