Inuit 100-nik sinneqartut maannakkorpiaq Nuummiipput, OLT aqqutigalugu ataatsimiigiarlutik. Eqqartugassat assigiinngitsut 16-it eqqartorneqassapput, nunasiaateqarsimasut maannakkut EU-mut ilaasortaanerat ilaatigut eqqartorneqassalluni.
Ataatsimeeqataasut tassaapput OLT EU-kommissionilu.
OLT-mi siulittaasuuffik ukiuni arlalinngortuni nunatsinnit tigummineqarpoq, ataatsimiinnerlu nunatsinni ingerlanneqarluni.
Nunanut allanut naalakkersuisoq Josef Motzfeldt, KNR-imut ullaaq pulaarpoq, OLT-milu siulittaasuuffeqarnerup ataatsimiinnerullu nunatsinni ingerlanneqarnerata pitsaaqutai ima eqqaavai:
- Uagutsinnut iluaqutaasussaq tassaavoq siulitaasuunitta nalaani suut oqaluuserineqassanersut aalajangeeqataaffigisimavarput. Massakkullu aamma nunarput periarfissaqalerpoq, nunarsuarmi tamarminngaaneersunit nunatta qanoq aaqqissugaanera takutissallugu.
- Nunattalu aqqissuussinikkut tunniussinnaasai tikeraartutsinnut iluatikkunartut arlallit qularnanngilaq takuneqarumaartut, nunanut allanut naalakkersuisoq Josef Motzfeldt oqarpoq.