Qaammammut nakkartoq

Europamiut qaammammuliartaatiliaat siullerpaaq qaammatip saneraa tungaani kujammut kippasissortaanut ullaaq manna nakkarpoq. – oqaatigineqarporli pilersaarutit naapertorlugit taamaattussaasimasoq.

Europamiut avataarsualiarnissamut sullissiviata ESA-p nalunaarutigaa, qaammatini 16-ini misissuinertik maanna naammassisoq. Qaammammuliartaat Smart-1-imik taaguutilik tappavani qaammammi tammajuitsoqalerpoq. Tuffia 10 meterisut takitigisimavoq 1 meterisullu ititigisimalluni.

Qaammammuliartaateeraq taanna atorlugu qaammat ilisimasassarsiorfigineqartussaasimavoq, teknologi-lu nutaaq atorlugu siunissami avataarsualiartarnissaq misileraaffigineqartussaasimalluni.

Taama avataarsualiartaammik aallartitsinermi pingaartinneqarnerpaanut ilaavoq, motori seqerngup kissarneranik ingerlatilik tassa ion-motorip misiligarneqarnissaa. Assersuutigalugu qaammammuliartitaammi Smart-1-imi orsussaq 50 literiinnaq atorneqarpoq, taassumalu aqqutaa 100 mio. kilometerit missaanniittoq, avataarsualerisut ESA-kkut unnersiutigaat.

Aallartitsinermi tassani siunertarineqarpoq siunissami inuit siulliit qaammammi najugaqartussat piareersaavigineqarsinnaanissaat, taakku tassani najugaqarnerminni taamaalillutik ulloriarsuarmut Marsimut qanillattorsinnaalerniassammata.