Sapaatip-akunnerata naanerani nukappiaqqat marluk 13-inik 14-inillu ukiullit biilinik tillitaminnik aallarussigaluarlutik Nuup Nuussuartaani aporsimapput biili sequmilluinnarlugu, nukappiaqqallu aappaa qaratsamigut sajuppillatsitsisimavoq.
Biili tillitaat Toyota-voq ingerlavialli sivisusimanngilaq, aallaraluarlutik biilip sioraatigut qulliup napparutaanut aporujussuarsimagamik. Nukappiaqqat marluullutik aalakoorsimasut politiinit aamma oqaatigineqarpoq.
Nukappiaqqat biilimit sequmissimaqisumiit ikiorneqarlutik aatsaat anillatsinneqarsinnaasimapput. Apormatalu eqqaani isiginnittunit politiinut kalerriutigineqalertorsimallutik.
13-inik ukiulik qaratsamigut sajuppillatsitsisimasoq napparsimaviliaanneqartariaqarsimavoq, maannali navianartorsiunngitsoq politiinit oqaatigineqarpoq.
Nukappiaqqat ukiukinnerat tunngavigalugu suliaq Nuup kommune-ata inunnik isumaginnittoqarfianut ingerlateqqinneqartoq politiinit erseqqissaatigineqarpoq.