Jyllandimi Ry-mi pisiniarfik, Kvickly, naatsiianik nunatsinneersunik tuniniaasalerusuppoq.
Naatsiiat Nuup kangerluaneersuupput, Kapisillit eqqaani Neriunameersuullutik. Midtjyllands Avis taama allappoq.
Naatitalerinermulli Kalaallit Nunatsinni suli pisortaqarfeqanngimmat, Kvickly nersutit nakorsaasa nakkutilliisoqarfianut immikkut ittumik qinnuteqartariaqarsimavoq.
Kalaallit Nunaata Ry-mi sapaatip akunnerata ataatsip iluani immikkut ittumik sammineqarnissaani naatsiiat tuniniarneqarniarput. Ruuat nunatsinneersut, immiaararlu nunatsinni immiugaq, nunatta immikkut sammineqarnerata nalaani aamma pisiarineqarsinnaassapput.
Naatsiiat ukiumut 90 tonsit nunatsinni naatinneqarlutillu tuniniarneqartarput. Nunatsinni tuniniarneqartartut 4 procentii nunatsinneersuusarput.
Naatsiiat imermik sermersuarmeersumik imerterneqartarput, kigaatsumillu naajartortarmata naatsiianut Danmarkimeersunut sanilliullugit mamaat kimittunerusarpoq.