Arnaq ukiuni arfineq-pingasuni aallarussaaqqasimasoq aniguisoq
Østrigimi pinerluttaalisitsinermi suliat paasiuminaannersarisimasaat paasineqarpoq. Niviarsiaraq qulinik ukioqartoq ukiut arfineq-pingasut matuma siornagut aallarussaavoq, taamanerniillu periarfeerunneqarluni. Ippassarlu arnaq inuusuttoq 18-inik ukiulik biilinit ingerlasunit qimaasoq politiinit apersorneqarmat, paasinarsivoq tassaasoq Natascha Kampusch, 1998-imi tammaaneqartoq.
Niviarsiaraq Natascha qulinik ukiulik atuariartorluni marsip ulluisa aappaanni 1998-imi aallarunneqarmat, Østrigimi politiit suliaasa annersaat aallartinneqarpoq.
Niviarsiaqqap ikinngutaa taamani oqarpoq, biilit assartuutit qaqortut takusimallugit, biililli qaqortut 1.000-t piginnittui apersorneqarnerat kinguneqanngilaq.
Niviarsiaraq periarfeerutiivinneqarpoq, politiillu ujariarfissaqartinngilaat.
Ippassarli tupinnartumik pisoqarpoq. Pisuinnaat aqqusernatigoortut tassanngaannaq takulerpaat, arnaq qarsungasoq biilinit BMW-nit aappaluttunit pissittoq naatsiiviillu ilaannut toqqorluni, assut paatsiveqarpasigani.
- Natascha Kampuschimik ateqarpunga, politiimukaammanni oqarpoq.
Niviarsissap ilisarnaatigisinnaasaatut qileroq niaquatalu ilusaa misissoriaramikku paasivaat ilumut Natascha Kapuschiusoq.
- Neriuppunga, ilumut neriuppunga taannaasoq, kisianni upperiuminaaqaaq, angutaa oqarpoq.
Politiit niviarsiaqqap parnaarussaaqqaffigisimasaa biilimik aappaluttumik BMW-mik piginnittup illuata garageaani nassaaraat. Biilileriffinnisulli naqqup ataa qaarusuusaliorneqarsimavoq, 50 gange 50 centimeteriinnarmik isertarfilikkamik, elektroniskimik parnaarsaasikkamik. Iluani meeqqat atuagaat inersimasunullu atuagassiat nassaassaapput.
Politiilli paasiniaanerminni suli paasinngilaat niviarsiaq kinguaassiutitigut atornerluinissaq siunertaralugu aallarussaasimanersoq.
Niviarsiaq apersorneqarsinnaanngilaq, tassami inunnut allanut ukiorpassuarni attaveqarsimanngilaq.
- Kisianni, nakuuserfigineqarsimarpasinngilaq, politiit oqarput.
Angut qimarngussisimatutut pasisaq tassaavoq 44-inik ukiulik informationstekniker Wolfgang P. Taanna ippassaq unnukkut toqungasoq nassaarineqarpoq, kaasarfiani nassaarineqarput BMW-t aappaluttut matuersaataat. Angut taanna ukiut arfineq-pingasut matuma siorna niviarsiaqqap periarfeerunneqarneranut atatillugu apersorneqareersimavoq, biilinik angallassissutinik qaqortunik peqartunut ilaasimagami.
