Tyskland-imi sakkortuumik peqqarniisaarniartoqarnissaanik siorasaarisoqartoq, Tyskit Naalagaaffimmi pissutsinut ministeri nalunaarpoq. Taamatut siorasaarisoqalernera pissuteqarpoq, libaniiseri ilinniartoq 21-nik ukiulik ippassaq Kiel-imi qimuttuitsoqarfimmi tigusarineqareersorlu.
Inuusuttoq peqqarniisaarnianut ilaasutut aammalu toqutseriarsimasutut pasineqartoq arfininngormat Tyskland-imiit qimaalluni aallalersoq tigusarineqarpoq. Paasissutissat allat oqarput, peqqarniisaarniarluni nunanut allanut aallalersimagaluartoq. Qimuttuitsoqarfimmili qaartartunik nassaartoqarsimanngitsoq politiit oqaluttuarput.
Tigusarineqartoq sapaatip akunnerani kingullermi qimuttuitsunik marlunnik qaartitsiniarsimagaluarpoq. Qaartitsissutissarli ajoquteqarsimammat, qaartitsinissaq iluatsinngitsoorsimasoq, Tyskland-imi nutaarsiassaqartitsiviit allapput. Peqqarniisaarniaqataasup aappa suli tigusarineqanngilaq. Maannakkullu Tysklandimi isumannaallisaaneq sakkortusineqarsimasoq ministeri nalunaarpoq.