Iluliarmiut qaleralittassinneqarusupput
Naak, ukiuni kingullerni biologit Ilulissani qaleralittassanik killilersuineq ajoraluartut maannakkut Ilulissani aalisartut piumasaqaatigaat ukiortaamiit qaleralittassiisoqartalernissaa.
Naalakkersuisut siulittaasuata ukiortaami oqalugiaammini qaleralittassiisoqartalernissaa eqqaavaa, eqqarsaammili Aalisarnermut Pisortaqarfimmiunut ingerlatinngitsoorsimagunarpaa, tassami Pisortaqarfimmi immikkoortortamut pisortaq Emanuel Rosing KNR Avannaanut oqarpoq naalakkersuisut siulittaasuata suaarutigisaa aallaavigalugu Nalunaarusiamik piareersaasimallutik, annertunerusumilli saaffiginnissutaasimanngimmat pisoq ingerlateqqinneqarsimanngitsoq oqaatigaa.
Taamaattoq Ilulissani aalisartut illoqarfimmi politikeriminnit tapersersorneqarlutik ukiortaamiit qaleralittassiisoqartalernissaa neriuutigaat.
- Aalisartut qaleralinnik aalisapiluttoqarpallaalernera suaarutigaat, tamannalu tusaanngitsuusaaginnarneqarsinnaanngilaq, Siumut sinnerlugit kommunalbestyrelsemi ilaasortaq Palle Jerimiassen KNR Avannaanut oqarpoq.
Aamma Ilulissani Aalisartut peqatigiiffiat KNAPP sinnerlugu siulittaasoq Peter Olsen oqarpoq qalerallit milligaluttuinnartut aalisartut maluginiartaraat.
Iluliarmiut annerusumik umiatsiaararsorlutik qaleralinniartartut, avataaniit qaleralinniartartut autolineqarlutik atortorissaaraluttuinnarput. Soorunalimi aalisartut aamma Ilulissani piorsaarusupput, taamaakkaluartoq piuartitsinissaq siunertaralugu oqummersat qassit Ilulissat Kangerluanni, Kangiani, atorneqaqqusaanersut killiliivigalugu kommunalbestyrelse aaliangeeqqammersoq erseqqissatigaa.
Taamatuttaaq Palle Jerimiassenip ukiup tulliani missingersuutini aalisarnermut siunnersorteqalernissaq ilanngunneqarsimanerarpaa, aalisarnerup tungaatigut sullissineq piorsaanissarlu kommunemi annertusarniarlugu.
