Libanonimi illoqarfiit aseruatitikkat ingasalluinnarput
Libanonimi illoqarfiit aseruatitikkat ingasalluinnarput. Danmarkip Radioani sulisoq Poul F. Hansen Israelip avannaatungaani illoqarfik hizbollah-p raketsiinit 700-riarluni eqqortissimasoq najorlugu oqarpoq, qaartartumeeriffiusut qanoq aserorsimatiginerat, kikkut najugaqarfigineraat apeqqutaalluni, assigiinngissuteqartoq.
Libanonimi illoqarfiit ilaat suujunnaarsingajallugit qaartartumeeriffiusut takoreerlugit oqaatigaa illoqarfik maanna najukkani soorlugooq susoqarsimarpianngitsoq. Iikkat putui aseruatiternerillu allat soqutaarpasinngillat – aammami inuit inuunerannik naleqannginnamik.
Soorunalimi qaartartumeerinerit innuttaasut tusaajuarlugit nuannarisimassanngilaat, pingaartumik timmisartukkut saassussisoqalerneranik kalerrisaarutit, siggartalertarnerat sungiussassaasimanngilaq, DR-ip aallartitaa oqarpoq.
Sorsunneq aamma innuttaasunit assigiinngitsumik isumaqarfigineqarpoq. Ilaasa aallartinnera kukkunerusorigaat, ilaasalu sakkortunerusariaqaraluarsorigaat.