Takornariat marluk Ilulissani politiinit ujaarineqarput
Takornariat estlandimiut marluk Ilulissani politiinit ujaarineqarput. Takornariat taakku estlandimiut angalatitseqatigiiffiat aqqutigalugu nunatsinni angalaarput, inuit katillugit arfineq-marluullutik.
Ujaarineqartut Ilulissat illoqarfianni ippassaq ulloqeqqata siorna nalunaaqutaq qulit missaanni kingullermik takuneqarsimapput. Ilimagineqarpoq Ilulissat eqqaanni qaqqissimassasut.
Angalaqatitik ilagalugit Ilulissat kangerluannut ippassaq unnukkut nalunaaqutaq qulingiluanut angalaartussaasimagaluarput, umiarsualivimmilli takkussimanngillat, inissisimaffigisaminnullu aamma angerlarsimanatik.
Qulimiguulik atorlugu Ilulissani politiit ullumi ujaasigaluarput, maannamut kinguneqanngitsumik.
Ujaarineqartup aappaa 28-nik ukiulik tassaavoq Leonid Tolstov. Taanna 180 centimeterit missaannik angissuseqarpoq, pualananilu tuattuunngilaq, naatsunik qernertunik nujaqarluni. Tungujortumik anorisiummik jakkeqarpoq, qernertuugunartunik qarleqarluni, arpaatinillu kamippaqarpoq(terrænsko).
Leonid Tolstov isaruaqarpoq.
Ujaarineqartup aappaa tassaavoq Kaarel Liiväe, taanna 175 centimeterit missaannik angissuseqarpoq, nerinnattuulluni, qernertunik naatsunik nujaqarpoq, kassera meqqoqarani. Qernertumik jakkeqarpoq, qernertuugunartunik qarleqarluni, arpaatinillu kamippaqarluni.
Ujaarineqartunut tunngasunik ilisimannittoqaruni Ilulissani politiinut saaffiginnittoqarsinnaavoq, oqarasuaat 94 32 22 imaluunniit angallattagaq 54 38 22 atorlugu.
