Yellowknife-p eqqaani orpippassuit ikuallattut
Yellowknife-ip avannaatungaani Deline-imi orpippassuit ikuallammata, nunaqarfimmi innuttaasut 500-t missaanniittut qimarngunneqartariaqalersinnaapput. Taama Nunatsiaq News nittartakkamini allappoq.
Yellowknife-i sapaatit akunnerini kingullerni arlaqartuni kiarujussuaqattaarluni siallertarsimanngilaq, taamaasillunilu nuna panilersimaqaluni.
Orpippassuarni ikuallattoqarnera ataasinngormat paasineqarpoq, ikuallaffiillu katillugit 35-t qatserneqarsimallutik. Maannakkut ikuallaffiit ilaat nunaqarfimmut Deline-imut 11 kilometeriinnarnik ungasitsigisumiilersimavoq, taamaammallu innuttaasunik qimarngutsitsinissaq piareersimaffigineqalerluni.
Ikuallaffiuli nalaaniittut neriuutissaqarput, ullumi siallernissaa ilimagineqarmat.