Qimaasunut ineqarfik qaartartumeerneqarpoq
Israelimiut Libanonimi timmisartukkut unnuaq saassusseqqipput.
Libanonip avannarpasinnerusortaani, kangiatungaani, qiterpasissortaanilu aqquserngit, ikaartarfiillu qaartartumeerneqarput, illuillu aamma qaartartumeerneqarlutik.
Libanonip kujasissortaani Sidonimi palæstinamiut qimaasunut ineqarfiat, Ain al Hilweh-mik atilik, timmisartukkut saassunneqarportaaq.
Ain al Hilweh 50.000-inik inoqarpoq, Libanonimilu qimaasunut ineqarfiusunit annerpaartaalluni.
Ikinnerpaamik inuk ataaseq toqutaavoq, arfineq-pingasullu ikilerneqarlutik. Meeqqat tallimat ikiligaasut akornanniipput.
Israelip Hizbollah-llu akersuunnerat sapaatit akunneri sisamat matuma siornatigut aallartimmalli, Palæstinamiut qimaasunut ineqarfiat siullerpaamik eqqorneqarpoq.
Israelip Hizbollah-llu akornanni akersuunnerit unitsinneqarnissaa anguniarlugu, Naalagaaffiit Peqatigiit isumannaallisaaniaqatigiivini aalajangersagaq isumaqatigiinngissutigineqarpoq.
- Libanon-i pillugu aalajangersagaq nutaamik oqaasertalersugaq piariiliivippoq, Frankrigip Naalagaaffiit Peqatigiivini aallartitaat Jean-Marc de la Sabliére nutaarsiassaqartitsivimmut Ritzau-iumut oqarpoq.
Aalajangersakkap kingulliup oqaasertai Libanonimit nunallu allat arabiamiortalinnit iluarineqanngilaq, Israelip Libanonimit qimagunnissaannik piumasaqaateqanngimmat.