Isikkamik arsaalluni pissartanngorniunnerit Sisimiuni ullup aappassaa ullumi ingerlanneqarput.
Ullormi unammiffimmi siullermi marloriarluni unammisoqarmat unammisut naligiiginnarput, siornalu pissartat Nuummeersut B-67-imi arsaattartut Iluliarmiunut N-48-mut unammigamik 5-1-mik ajugaapput Tasiilameersullu A.T.A.-kkut
K-33-mut Qaqortumeersunut unammigamik 4-1-mik ajugaallutik.
Ualeq marloriarluni unammisoqarpoq.
Arsaattartut kujataamiut imminnut unammilluartartut Narsameersut Qaqortumeersullu gruppe 2-mi unammimmata Narsarmiut N-85 4-2-mik ajugaapput. Taamaalillutik K-33-mi arsaattartut aappassaa ajorsarnerminni pissartanngorniunnermi unammisinnaajunnaarput.
N-85-imi arsaattartut tupaallatsinneqarput ukiorpassuarni sungiusaasorisartik, naalakkersuisunut ilaasortaq, Finn Karlsen, unamminerminni takkuteriasaarmat, N-85-imilu arsaattunik siunnersuisuulerluni. Tamannalu iluaqutaagaatsiarsimasoq unamminerup naammassinerani paasinarsivoq.
Nuummiut B-67 Qeqertarsuarmiullu G-44 ualeq gruppe 2-mi unammimmata ajuuttoqanngilaq.
Taakku unammillualaavissut, Lars Lundblad nalunaarpoq.
Malamuk A.T.A-lu imminnut kingusissukkut unammipput kingusinnerusukkullu S.A.K. N-48-lu aamma unammissallutik taakku unamminerminni angusaat aqagu ullaakkut radioaviisimi tusarsinnaajumaarpasi.