Aarrit pillugit nalunaarut nutaaq atuutilerpoq
Skrevet af Mads Lynge
08. august 2006 10:45
Aarrit piniagaanerat illersugaanerallu pillugu nalunaarut, naalakkersuisut ukioq manna juulip tallimaanni akuersissutigaat.
Nalunaarut aggustip aallaqqaataani atuutilersoq, nalunaarut 1998-imeersoq taarserpaa.
Nalunaarullu nutaaq pingaarutilinnik allannguutitaqarpoq:
Piaqqat arnavissanik ilaqartut, arnavissallu inersimasut, Qaanaap Kommunea ilanngunnagu, kiisalu aarrit nunamiittut nunalittarfimmiittulluunniit eqqissisimatitaapput.
Aarrinik pisassiissuteqartarneq taamatullu akuersissutit atulersinneqarputtaaq.
Inuit inuussutissarsiutigalugu piniarnermut allagartallit kisimik aaffanniarnermut akuersissummik pisinnaatitaapput.
Nalunaarut nutaaq naapertorlugu aaveq aallaaneqartinnani naalinneqassasoq piumasaqaataavoq.
