Islandimiut Danmarkimi suliffeqarfissuarmik piseqqilerput

Islandimiut aningaasaatilissuit Danmarkimi pisiniaqqiinnaleqaat. Pisiniarfissuit, timmisartuutileqatigiiffik Sterling aviisillu pisiarereerlugit Danmarkimi suliffeqarferujussuarnik maanna pisipput.

Islandimiut suliffeqarfiutaata Marel-koncernip danskit suliffeqarfiutaat Århusimi angerlarsimaffeqartoq Scanvaegt-koncern 815 million koruunilerlugu pisiaraa. Suliffeqarfissuarmi sulisut 2000-t – taakkunannga 700-t missaanni Danmarkimiittut –annilaanngatissaqanngillat - soraarsitsiortortoqarnianngilarmi.

Islandimiut suliffeqarfiutaat, Marel aamma Scanvaegt, nerisassat, soorlu puulukimernit, nersussuamerngit, timmissat aalisakkallu, suliarineqarnerini teknikkikkut atortorissaarutinik immikkuullarissunik nunarsuaq tamakkerlugu tuniniaasartuupput.

- Suliffeqarfiutivut imminnut suleqatigiilluarput, Marelimi pisortaaneq, Hördur Arnarson, oqarpoq.

Suliffeqarfissuit kaaviiaartitaasa ukiut tallimat qaangiuppata 500 million euro sinnersimassagaat ilimagineqarpoq, 2015-milu 1 milliard eurot – tassa 7 milliard koruunit - missaaniinnissaat ilimagineqarluni.