Sisimiuni 1918-miit 1951-ip tungaanut pisut allaganngorlugit toqqortat Danmarkimi toqqorsivissuarmi nassaarineqartut Nunatta Katersugaasiviani misissorluarneqartussanngorput.
Sisimiut illoqarfittut tunngavilerneqarnerminiit ukioq manna 250-nngortorsiornerani, oqartoqarluarsinnaavoq Sisimiormiut ilimaginngilluinnakkaminnik tunissutisisimasut, allakkammi qimerluualaaraanni illoqarfik sutigut tamatigut inerisimasoq atuarneqarsinnaavoq.
Danskit naalagaaffianni toqqorsivissuarmi toqqortanik aaqqissuussisoqarmat karsit 223-t nassaarineqarput, paasinarsivorlu allagaatit tassaasut Sisimiuni niuertup katersai.
Nunatta Katersugaasiviani pisortaq Toqqorsivissuarmit kalerrinneqarami nuannaaqaaq.
- Sisimiuni pisimasut allaganngorlugit perusunnerigut aperimmata akuersaapallappagut, Niels Frandsen unnersiorpoq.
- 1920-miit 1921-mut tunineqarsimasut uani atuarneqarsinnaapput. Eertat qaqortut 564 kiilut. Sukkut 8.875 kiilut taamani Sisimiuni innuttaasunut 800-uusunut agguagassat. Agguaqatigiissillugu inummut ataatsimut sukkut 10 kiilut. Aamma meqqutit 8.000-ingajaat tunineqarsimapput, agguaqatigiissillugu arnamut ataatsimut meqqutit 20-t, Niels Frandsen oqaluttuarpoq.
Toqqortaatit Nunatta Katersugaasiavianiitinneqarput ukiunilu arlalinni tulliuttuni misissuiffigineqassallutik.
Katersugaatit misissornissaannut Sisimiut Katersugaasiviani pisortaq Anne-Mette Olsvig qilanaarpoq, neriupporlu allagaatit ilaat arlaanni saqqummersissinnaajumaarlugit.
Sisimiut peqatigiiffeqarnikkut, qillertuusaliorfeqarnikkut, amutsiveqarnikkut teknikkimullu tunngasuni qanoq ineriartorsimanera allagaatitoqqani takuneqarsinnaavoq.
Sisimiut Katersugaasiviat allatsitsisarnermut tunngasunik immaqa aamma saqqummersitsisassaaq:
- Niuertumut ikiorti Hans Lennert meeqqamut tujuulussuarsisimavoq, sanasoq Simon Lennert qapiut, pilattuuteeraq, savissallu 48-t pisiarisimavai. Kiffaq Otto Fleischer nutsugiarsisimavoq aamma nappaja Rasmus Lennert iverutisisimavoq kisaarartalinnik.
- Iverutit taakku ilaqutaasut suli pigigunikkit takusinnaavaat 1920-mi pisiaasut, Niels Frandsen allatsitsinermut tunngasut qupperaatigalugit nassasiivoq.
Avannaani Sisimiut killigalugit kujataanilu Nanortalik killigalugu oqaluttuarisaanermi pisut allaganngorlugit toqqortaatigineqartut ikittuinnanngorsimapput.
Toqqortaatit amerlanersaat umiarsuaq Hans Hedtoft aqqutigalugu 1959-imi Danmarkimut nassiunneqarput, taakkulu umiarsuaq umiiarmat annaaneqarlutik.