Barentip imartaani russit aalisapilunnerat ingasappallaarunnaarpoq – aalisapilunnermillu akiuiniarneq ingerlalluarpoq.
Aalisarneq pillugu Norgemi oqartussaasut taama nalunaarput.
Russit kilisaataataat siornamut sanilliullugu 19.000 tonsinik ikinnernik ukioq-manna saarullissimapput. Kisitsit saqqummiunneqartoq russit umiarsuaasa Norgemut tulaassisarneri tunuliaqutaralugit – aamma kilisaatit umiarsuillu assartuutit Barentip imartaani angalasut nakkutigeqarnerannit annertussusiliinermit aallaaveqarpoq,
Aalisarnermut Norgemi oqartussaneersoq, Peter Gullestad, nittartakkamut Euroarctic.com-imut oqarpoq, aalisapilunnerup annikillinera isumalluarnartoqartikkini.
- 100.000 tonsit sinnerlugit siorna aalisapiluttoqarpoq, tamanna ukiup ataatsip ingerlanerinnaani 20 procentimik apparsinnaappat, suliniutitta ingerlatiinnarnissaa suli kajuminnarnerulissaaq, aappaagumullu suli isumalluarnerulerunarpugut, Peter Gullestad oqarpoq.