Pinngitsaaliilluni arnerisimasoq Narsami ujaaraat
Narsami illoqarfiup qeqqani narsaamanerujussuarmi, Kirkemosemi, angut arnamik pinngitsaaliilluni ippassaq ullaaralaaq arnerisimasoq politiit ujaaraat.
Arnaq 20-it sinnilaarlugit ukiulik uppitipilooriarlugu pinngitsaalineqarsimavoq. Pinngitsaaliisup isikkua arnap politiinut oqaluttuarilluarsinnaasimavaa. Angutillu taassuma tigusarinissaanut politiit tassa ikiortissarsiorput.
Angut 30-t 40-llu missaanni ukioqarunarpoq, 170 centimeterit missaannik angissuseqarluni. Kalaalerpasissumik isikkoqarpoq, kisianni naatsunik qeratasuunik qaamasunillu nujaqarluni. Tungujortunik iseqarpoq, tallukkaajullunilugooq, ateqarunarporooq Bent.
Angutip kinaaneranik ilisimannissinnaasut Narsami politiinut nalunaarsinnaapput, Narsami politiit oqarasuaataat tassaavoq 66 12 22.
