Naatitanik, soorlu gulerøddinik broccolinillu, meeqqat neriarniartillutik qissattarnerat nilliasarnerallu asuleernerugunanngilaq.
USA-mi ilisimatuut meeqqat 65-t misissuiffigeqqammivaat, meeqqallu nerisassanut sungarnitsunut qasilitsulinnulluunniit misikkarinnerusut naatitartorumannginnerusartut misissuinermi paasineqarpoq.
Misissuinerup nalunaarusiorneqarnerani allassimavoq inuup sananeqaataasa ilaata aalajangersimasup - TAS2R38-imik taaguuserneqarsimasup - aalajangertaraa, inuk nerisassanik sungarnitsunik qasilitsunilluunniit sapigaqarnersoq. Sananeqaatip taassuma naatitanik mamarisaqarnersugut aamma aalajangertarpaa.
Meeqqat 8 procentii sananeqaammik taassuminnga kingornussisimanngitsut naatitartorusuttarsimanngillat. Meeqqallu 32 procentii sananeqaammik tassuminnga kingornussisimasut gulerøddinik broccolinillu sassaallerfigineqaraangamik nakeriallattarsimapput.
Angajoqqaat namminneq naatitanik mamarisaqaramik meeqqamik naatitartorusuttannginnerat sumik peqquteqaratarsinnaanersoq paasisariaqaraat ilisimatuut oqarput.