Rice Libanonimiullu akerleriipput

Amerikamiut nunanut allanut ministeriata Condoleezza Rice-p ullaap tungaa Israelimiut naalakkersuisut siulittaasuat Ehud Olmert Jerusalemimi Libanonimiut Israelimiullu aporaaneri pillugit ataatsimeeqatigaa.

Libanonip illoqarfiisa pingaarnersaannut Beruitimut ippassaq Condoleezza Rice tupaallatitsilluni tikippoq libanonimi naalakkersuisut taassuminngarpiaq eqqartueqatigiartorlugit.

Rice-p uteqqattaarlugu oqaatigisarpaa Kangiani Qiterlermi massakkut akersuunnerit nutaamik kinguneqarumaartut sunarpiarli pineraa eqqoriaruminaappoq. Præsident George W. Bush-ip Irakimi innuttaasut tamarmik oqartussaaqataalernissaanik suliniuteqarnera pineraa imaluunniit uteqattaartuartumik akersuuttarnerit hizbollah-kkut israelimiunik aallarussisarnerisa kingunerisaanik aallartittartut pinerai ilisimaneqanngilaq.

Saddam Husseinip kisermaassilluni naalakkersuisuujunnaarnerata kingorna syriamiut iranimiullu hizbollah-kkunnik tapersersuisut israelimiunit saassunneqaqattaarneri amerikamiunit akerlerineqalersimasutut isikkoqarpoq.

Rice-p tikeraarnera annerusumik angusaqarfiunngilaq. Libanonimi naalakkersuisut Rice-lu isumaqatigiissinnaasimanngillat. Ataatsimeeqatigiillu oqqallutik avissaarsimasut Libanonimi aviisit ullumi saqqummersut allaaserinnipput.