Air Greenlandip USA-mut timmisartuussisalernissaa suleqatigiilluartitsissaaq

Aappaagumiit Air Greenland USA-mut timmisartuussisalerpat, suleqatigiillualernermik tamanna isumaqassasoq unnersiutigineqarpoq.

Ulluni makkunanerpiaq Air Greenland Amerika-mi timmisartuutileqatigiinnut SouthWest-ikkunnut niiveqateqaleruttorpoq.

SouthWest nunarsuarmi timmisartuussisartut akikinnerpaartaannut ilaavoq assullu USA-mi atorneqartaqaluni.

Timmisartuutileqatigiiffik taanna Texas-imi aallaaveqarpoq, Amerikallu kangiatungaani pingaarnertut timmisartut mittarfissuannik pigisaqarluni.

SouthWest-ip timmisartuutai Baltimore-miit Amerika-mi illoqarfinnut allanut 40-nut ingerlassisarput, maannalu tassa aamma Air Greenland tassunga ilannguttussanngorpoq.

Air Greenlandip pisortaa Flemming Knudsen oqarpoq, isumaqatigiissuteqarniarnermi mikisualuit suli iluamik inissivinngitsut, neriuutigaali isumaqatigiissut ukiamut naammassineqarumaartoq.

Air Greenland USA-mut aappaagu majip qaammataani timmisartuussisalissaaq.