Kosovo pillugu eqqartuussivilersuussiniarput
Naalaagaaffiit Peqatigiit Sorsunnermi pinerluuteqarsimasunik Jugoslaviaasimasumi eqqartuussiviata Serbiap naalagarisimasaata Slobodan Milosevic-ip eqqartuunneqarnissaa upernaaq taamaatiinnarpaa, eqqartuussinissaq aallartinngitsoq inuttaa toqummat. Ullumikkulli eqqartuussivimmi suliassaq nutaaq aallartissaaq, Kosovomi 1998-imi 1999-imilu sorsussimanermi pisimasup inatsisilerinermut tunngasumik naggaserneqarnissaanut periarfisseeqqittoq.
Slobodan Milosevic-ip isertuussimanngilaa 1998-imi suna anguniarsimanerlugu, Kosovo-mi sorsussimaneq pillugu eqqartuussinermi nutaami tamanna saqqummiunneqarpoq.
Slobodan Milosevic oqarsimavoq 1945-mi 46-milu iliuuserisimasatik iliuusereqqinniarlugit, tassalu Kosovomiut Albaniamiut katersoriarlugit toqorarniarlugit.
Milosevic-i toqoreermat iliuuserisimasai pillugit eqqartuunneqarsinnaanngilaq, kisiannili generaalit politikkerillu arfinillit Milosevicimut ikiuisimanertik pillugu eqqartuunneqarsinnaapput.
Serbiamiut eqqarsartaasiat naapertorlugu, Albaniamiut musliimit Serbiamiut oqaluttuarisaanerannut upperisaannullu aarlerinartorsiortitsisimapput, tamannalu qaangerniarlugu Kosovomi toqoraaneq pisimavoq.