ISS-imi Londonimi Haagimilu eqqiaasutut atorfillit arfineq-pingasut pitsaanerusumik atugaqartitaanissartik neriuutigalugu ISS-ip qullersaqarfianut Københavnimiittumut ullaaq oqaloqatiginnikkiartorput.
Eqqiaasut isumaqarput ISS-imit pitsaasumik atugaqartinneqaratik, tamaammallu kattuteriarlutik ISS-ip aqutsisuuneri akerliuffigiartorpaat.
- Hollandimiit Tuluillu Nunaanniit maannarpugut pitsaanerusumik atugaqartitaanissarput piumasariniarlugu. Qullersaqarfimmut isereerutta pisortaaneq ataatsimeeqatiserissavarput, qullersaqarfimmut isinngitsiarnerminni eqqiaasut oqaaseqartitaat, Ron Meyer, oqarpoq.
Londonimi Haagimilu ISS-imi eqqiaasut sulinerminni atugaritinneqartut pitsanngorsaaffigineqarniassammata siullertut sulisartut kattuffiini ilaasortanngornissartik kissaatigaat. Kattuffinni ilaasortaanissaq illoqarfinni pineqartuni ISS-ip ajornakusoortikkaa eqqiaasut oqarput.
Taassuma saniatigut akissarsiaginnerulernissartik angorusuppaat. Eqqiaasut 62 koruuni inorlugu maanna nalunaaquttap akunnermusiaqarput.
ISS nunarsuaq tamakkerlugu suliffeqarfiuvoq nunani 43-ini inunnik 300.000-t sinnerlugit sulisulik.
ISS nunatsinni aamma immikkoortortaqarpoq.