Naalakkersuisut siulittaasuata statsministerillu Canadamiut puisinniartarnerat isumaqatigiinngissutigaat

Canadamiut puisinniartarnerat Hans Enoksenip Anders Fogh Rasmussenillu isumaqatigiinngissutigigaat ullumi naalagaaffeqatigiinneq pillugu ataatsimiinnerup kingorna tusagassiortunik katersortitsinermi malunnarsivoq.

Nunatsinni naalakkersuisut puisit amiinik Canadameersunik piseqqittoqartalernissaanik aalajangernerannik inatsisinik atortitsinermut ministerip Lene Espersenip isornartorsiuinera Danmarkimi naalakkersuisooqatigiinnit isumaqatigineqarnersoq, Hans Enoksenip paaserusuppaa.

Tamatumunnga ministeriuneq ima oqarpoq:

- Inatsisinik atortitsinermut ministerip Kalaallit Nunaanni naalakkersuisut isornartorsiunngilai. Danskit naalakkersuisuisa Lene Espersenillu puisinniartarneq ataqqivaat Namminersornerullutillu Oqartussat suminngaanniit pisiniartarnissartik nammineq oqartussaaffigaat, ministeriuneq Anders Fogh Rasmussen tusagassiortunik katersortitsinermi ullumi oqarpoq.

Hans Enoksenili allatut isumaqarpoq.

- Inatsiseqarnermut ministerip puisit amiinik pisiniarnitsinnut akuliunnera sakkortuumik avoqqaarliutigaara, Hans Enoksen oqarpoq.

Uumasut naalliutsillugit piniartarneq danskit naalakkersuisuisa akuerisinnaanngikkaat ministeriunerup erseqqissaatigaa. Canadamiulli anaartaallutik toqoraasarnerat naalliutitsilluni toqoraanertut danskit naalakkersuisuisa isigineraat pillugu Anders Fogh Rasmussen aperineqarami akiumanngilaq. Taamaakkaluartoq puisinik anaartaasut TV-kkut aallakaatinnerat pillugu ima oqarpoq:

- Assit takusakka nuannarinngilakka immikkullu ilinniarsimannginnama naalliutitsinerunersoq naalliutsitsinerunnginnersorluunniit oqaatigisinnaanngilara. Allat ilinniarsimasut taanna pillugu oqaaseqarsinnaapput, Anders Fogh Rasmussen oqarpoq.