Nunat pisuunerpaat nakkutigineqalerput

Nunarsuarmi nunat pisuunerpaat arfineq-pingasut Afrikami ikiuiniarnermut neriorsuutitik naapertorlugit aningaasaliisarnersut paasiniarlugu Tuluit Nunaanni ministeriuneq Tony Blair nakkutilliisuutitanik ullumi pilersitsisivoq.

Naalagaaffiit Peqatigiit qullersaata Kofi Annanip nakkutilliisuutitat aqussavai. Nunarsuarmi angutip pisuunerpaap qarasaasialeriffissuarmik Microsoftimik piginnittup Bill Gatep nakkutilliisuutitat sulinerat aningaasalersorpaa.

Tony Blair naapertorlugu nakkutilliisuutitat allamik suliffeqaratik nunat arfineq-pingasut nunarsuarmi pisuunerpaat siorna Skotlandimi neriorsuutitik naapertorlugit Afrikamut aningaasaliisarnersut misissuisassapput.

Nunat pisuunerpaat taamanikkut neriorsuipput 300 milliardi koruuninik 2010-miit ukiumut aningaasaliissutigisartakkatik qaffanniarlugit. Aningaasallu neriorsuutigineqartut affai Afrikami ineriartortitsinermut immikkoortinneqartassasut ilanngullugu neriorsuisoqarpoq.

Neriorsuutit eqquutinneqarsimanersut tusagassiortunik misissorneqarsimavoq:

Nunat piitsuunerpaat nunanut allanut akiitsui piffissaq eqqorlugu isumakkerutaapput. Afrikap ineriartortinneqarneranut tapiissutit suli tamakkerlutik tunniunneqanngillat. Nunat pitsuunerpaat akiitsui isumakkeerutaasimarpasikkaluartut tapiissutinngorlugillusooq utertinneqartarsimarpasipput. Akiitsut isumakkeerutigineqarnerat Nigeriap Irakillu kisimik iluaqutigisimavaat. Afrikap suli iluaqutigisimanngilai.

Afrikap nunanut allanut akiitsui nunat pisuunerpaat Sankt Peterborgimi qaammatip tulliani ataatsimiilerpata eqqartorneqassapput.