Nunavummi Cambridge Bay-ip eqqaani umimmaat arfinillit toquinnarneqarsimasut nanineqarsimapput.
Umimmaat toquinnariarlugit qimaannarneqarsimapput neqaalu asiusimallutik.
- Paasisinnaanngilarput umimmaat asuli toqorarneqarsimaneri, tassami nerisassatsiarsuit inuppassuarnit nerisarineqarsinnaasut asuliinnarput, piniartoq, siornatigullu piniarnermik nakkutilliisuusimasoq, George Hakongak CBC-mut oqarpoq.
Akitsinni piniartut ileqquinik uniorlugit iliortoqarsimanera paasineqarpoq, sapaatip-akunnerani kingullermi innuttaasut ilaata umimmaat toqorakkat nanimmagit. Umimmaat takornarianit takuniarneqarluartartuupput.
- Takusaq kusanaaqaaq amiilaarnarlunilu, Kelly Caldwell, umimmannik toqorakkanik nanisisoq oqaluttuarpoq.
Nunavummi Cambridge Bay-ip eqqaani, Victoria Island-ip nalaani, umimmaat 2600-t missaannaanik amerlassuseqarput, eqqissisimatitsinissamillu suliniaqatigiinnit misissuititsisoqartoq CBC allappoq.