Ilisimatuut ikigisassaanngitsut nunatsinni aasaq manna ulapputissapput.
Nunatsinnut ornigulluni suliffissat allattorsimaffii Københavnimi Geocenterip saqqummiuteqqammerpai.
Geocenter København tassaavoq Danmarkimi Kalaallit Nunaannilu ujarassiuutut misissuiffiup, GEUS-ip, Københavnip Universitetiani Geologisk Institutip, Geografisk Institutillu, kiisalu Geologisk Museumip akornanni suleqatigiiffik.
Immap naqqani uuliasiornerit, Sermersuarminngaanniit imermik tunisassiulersinnaanissap misissorneqarnissaa, kiisalu Sermersuup akoorutissanik mingutsinneqarsimaneranik misissuinerit ukioq manna pilersaarutinut 27-usunut ilaapput.
Suliat arlallit aallartereerput, ukiarulu naammassinissaat pilersaarutaallutik. Suliassat allat juulip qaammataani aatsaat aallartissapput, sivikitsuinnarmillu ingerlanneqartussaallutik.
Avannaata kangisissortaani ujarassiornermut tunngasut uani pingaartinnerullugit taaneqarsinnaapput.