Saammaasseqatigiinniarnissaq ajornakusuussaaq
Saammaasseqatigiinnissaq angujumallugu pilersaarut Irakip naalakkersuisuisa siulittaasuannit Nuri al-Malikimit ullumi saqqummiunneqarpoq, inatsisartunilu oqallisineqarluni.
Pilersaarut pitsaasoq – piviusunngortinnissaali ajornakusoortussaq, kangiani qiterlermi pissutsit pillugit Syddansk Universitetimi ilisimatooq Helle Lykke Nielsen naliliivoq.
- Irakip naalagarsuarisimasaata Saddam Husseinip partiiaanit Baath-imeersut saammaasseqatigiinnissaq angujumallugu peqataasariaqartutut nalilerneqarput. Tamannali ajornakusoorsinnaassaaq, Helle Lykke Nielsen oqarpoq, nangillunilu:
- Sorsukkumatuut assigiinngitsorpassuit aamma avissaartinniarneqarput. Taanna aamma ajornakusuussaaq. Qanoq iliornikkut taakku sakkuiarneqassappat? Helle Lykke Nielsen aperivoq. Taassuma aamma ilimagaa sorsukkumatuut pineqartut sakkutuunut sillimaniarnermut sulialinnut akuutinniarneqarnerat imaannaanngitsuussasoq.
Saammaasseqatigiinnissamut pilersaarut 28-nik immikkoortortaqarpoq, anguniakkallu ilaat tassaavoq sorsukkumatuut peersinniarneqarnissaat, pikitsitsiniallu oqaloqatigineqarnerisigut eqqisseqatigiinnissaq.
Inuit saassussinerni annaasaqarsimasut taarsiiffigineqarnissaat aamma qulaakkeerniarneqarpoq, soorluttaaq suliffissaaleqineq annikillisarniarneqartoq.