Saattuarniat sumiiffikkaartumik mattusseqqusisut
Saattuarniarnerup unitsikkallarneqarnera pillugu naalakkersuisut nipangersimagaluartut, saattuarniat assigiinngitsut iliuuseqarusupput.
Saattuarniarnerup unitsikkallarneqarnera atorunnaarseqqullugu suliffeqarfiit pingasut, aalisartullu piniartullu peqatigiiffiata KNAPK-p kattullutik naalakkersuisunut saaffiginnissuteqarput.
Saattuarniarnerup unitsikkallarneqarnissaa pillugu attuumassusillit tusarniarneqareersut, Aalisarnermut piniarnermullu pisortaqarfiup nalunaarutigereerpaa.
Saattuarniarneq pillugu Pinngortitaleriffimmi seminareqartitsinermi tamanna pisimasoq, pisortaqarfiup oqaatigaa.
Saattuarniartartulli, KNAPK-lu saaffiginninnerminni oqaatigaat saattuarniarneq pillugu isumasioqatigiinnermi isumaqatigiissutaasimasoq inerniliussat pisortaqarfimmit KNAPK-mut apuunneqassasut, naalakkersuisunut apuussisoqartinnagu.
Naalakkersuisunut saaffiginnittut oqaatigaattaaq biologit innersuussisarnerat naammanngitsoq.
Sineriassuarput isorartoqimmat, saattuallu sumiiffikkaartumik aqilisarmata, saaffiginnittut oqarput ataatsimut mattussiniarneq illersorneqarsinnaanngitsoq.
KNAPK-p saniatigut, naalakkersuisunut saaffiginnittut tassaapput Nukik A/S, Maniitsoq Fiskeindustri A/S, kiisalu Tunitsivik Paamiut A/S.