176-inik ukioqarluni toqusoq
Charles Darwinip saaniluutigisimasaa Harriet, Australiami uumasuusivissuarmiitinneqarsimasoq, 176-inik ukioqarluni toqusimavoq.
Darwin-i 1835-imi Galapagos-ip qeqertaaniit umiarsuarmik HMS Beagle-imut ilaalluni Tuluit Nunaanukartilluni saaniluk ilaasimassangatinneqarpoq.
Taamanikkut Harriet tallimanik ukioqarpoq, puugutatullu angitigaluni.
Harrietili ilumut Darwinip pigisimaneraa ilisimatuunit apeqquserneqarpoq, Harrietip dna-va takutikkamiuk qeqertamit allaminngaanneersuusoq, Darwinip tikissimanngisaa.
Ukiuni tallimani Tuluit Nunaanneeriarluni, Harriet Australiami Brisbane-ip uumasuusivissuanut nuunneqarpoq. Tassani Harriet, angutiviaasorineqarluni Harry-mik atserneqarpoq, arnaviaanerali paasineqarmat kingumut Harrietimik atserneqarpoq.
Uumasunik paarsisup oqaasii malillugit Harrietip uummalliornini toqqutigisimavaa.