Sigguk Aasianni suliffissualiorusuppoq
Naalakkersuisut aalajangiinerisigut Baffinip kangerliumarngani qaleralittassat 1825 tonsit Sigguk A/S-imut ippassaq tunniutivinneqarput.
Naalakkersuisut aalajangiuppaat qalerallit Aasiannut tulaassorneqassasut, Sigguk A/S-illu Aasianni suliffssuartaarnissaata tungaanut qalerallit Royal Greenlandip suliffuanut tunineqartariaqassagunarput.
Frans Heilmann, Sigguk A/S-imeersoq, Aasianni tulaassuisariaqarnertik paasisinnaalluarpaa. Frans Heilmann ima oqarpoq:
- Paasilluarparput Aasiaat Kommuneani inissisimaneq. Aamma taanna peqataaffiginiarparput qaleralittassat aqqutigalugit ikiorsiiniarluta.
Qalerallit akii pillugit isumaqatigiinniarnerit ingerlanneqarput. Naallu Sigguk A/S nutaamik suli tusagaqarsimanngikkaluartoq, piareersimajuaannarput:
- Suli nutaamik takkuttoqqanngilaq, isumaqatigiinnissamulli piareersimajuaannarpugut. Asuli Aasiannukarnianngilagut. Aasiannukarniarpugut aalisakkanik tunitsivissaq pilersinniarlugu, Frans Heilmann oqarpoq.
Sigguk A/S Aasianni suliffissualiorniarput, pilersaarutillu malinneqassappata aappaagu tamanna pisinnaassaaq.
Royal Greenlandip pisortaa Henrik Lethip oqaatigaa isumaqatigiinniarnerni illuatungeriit ungaseqisut:
- Sigguk A/S-ip akigitinniagai uagut neqeroorutitsinnit sisamariaammik annertunerupput. Taama akisutigissappata isumaqatigiittoqarsinnaanngilaq. Immitsinnut ungaseqaagut, Royal Greenlandimi pisortaq Henrik Leth oqarpoq.