Itinerusumik eqqartuinianngilaq
Naak inatsisinik atortitsinermut ministerip Lene Espersen-ip arlaleriarluni Kalaallit Nunaanni eqqartuussiveqarneq pinerlussimasunillu isertitsiveqarneq pillugit pissutsit naammaginanngilluinnarneri nassuerutigisaraluarlugit, Stavangerimi Kalaallit Nunaanni inatsisit atortinneqarnissaannut naalakkersuisumik Aleqa Hammond-imik ataatsimeeqateqarnissaminut ullumi piffissaaruteriaannaavoq.
Lene Espersen ippassaq Luxembourg-imi ataatsimiippoq Stavangerimulli anngussinnaanissaminik neriulluni.
Nunani avannarlerni inatsisinik atortitsinermut ministerit Stavangerimi naapinneranni Aleqa Hammond-ip kissaatigigaluarpaa Lene Espersen-imik ataatsimeeqateqarnissi ilaatigut isertinneqarnissamut utaqqisarnerit sivisuut sivikillisarniarlugit isertitsivimmillu matoqqasumik sananissaq eqqaartorniarlugu.
Ataatsimeeqatigiissagaluarunilli Aleqa Hammond-ip ilimagisariaqanngilaa apeqqutit pingaaruteqartut akineqarnissaat, Lene Espersen-immi oqaatigaa, Aleqa Hammond ilassiniarlugu naapinnerminnilu itinerusumik eqqartuiniarnani.