Nordsømi uuliap gassillu akileraaruserneratigut akitsuuserneratigullu danskit naalagaaffiat ukioq kingulleq koruuninik 24 milliardinik isertitaqarsimavoq. 2004-mut naleqqiullugit 7 milliardinik amerlanerusunik, Danmarkimi nukissiuuteqarnermut aqutsisoqarfik nalunaarpoq.
Uuliap akoqanngitsup akisunerujussuata kingunerisaanik danskit naalagaaffiat iluanaaruteqarpoq. Ukioq kingulleq uuliap nappartamut akia agguaqatigiissillugu 54,4 dollareqarpoq, taamatullu akeqartitsineq 2004-mut naleqqiullugu marloriaatingajaavoq.
Danmark 1997-imiilli nammineq nukissiuutinik aqutsilerpoq. Nukissiuutinillu aqutsisoqarfiup uuliasiorneq pillugu nalunaarusiaani allassimavoq, Danmark 2015 ilanngullugu imminut pilersorsinnaassasoq. Piginneqatigiiffiit qulit nukissiuutinik Nordsømi suliaqartartut akileraarutaannit, akitsuutinillu assigiinngitsunit, aningaasat isertitarineqarsimapput.
Nordsømi uuliap affaa piiarneqareersimasoq eqqoriarneqarpoq.