Arfanniartarneq pillugu ataatsimiititaliarsuup, IWC-p, ukiumoortumik ataatsimeersuarnissaa Caribiami ullumi aallartissaaq.
Pinngortitaleriffimmi biologit nalunaarusiaat ataatsimiititaliarsuup ilisimatuussutsikkut ataatsimiititaliaata ataatsimiinnissaq sioqqullugu misissuataarsinnaasimavaat.
IWC-p ataatsimeersuarnerani Kalaallit Nunaata peqataatitaa, Amalie Jessen, Sermitsiami ullumi saqqummersumi oqarpoq, Pinngortitaleriffiup saqqummiussai assut naammagisimaarneqartut.
Qamutilissorluni arfanniartarneq pillugu arfanniartartup Leif Fontainep saqqummiussaa IWC-p ilisimatuussutsikkut ataatsimiititaliaanit aamma tigulluarneqartoq Amalie Jessen aamma oqarpoq.
Tikaagulliusaat tikaagulliillu pillugit ilisimasat nalorninartoqarpallaarnerarlugit Kalaallit Nunaat IWC-p ilisimatuussutsikkut ataatsimiititaliaanit sakkortuumik isornartorsiorneqartaraluarpoq.
Koreami Kujallermi siorna ataatsimeersuartoqarmat, isornartorsiuineq ima sakkortutigaaq, tikaagulliusaartassat 19-niit qulinut Kalaallit Nunaanniit nammineq ikilisinneqarlutik. Taama pisoqarneratigut tikaagullittassat 175-iusut aamma allanngortinneqanngillat.
Kalaallit Nunaat IWC-mut toqqaannartumik ilaasortaanngilaq, Danmarkilli aallartitaanut ilaalluni Savalimmiut peqatigalugit ataatsimeeqataasarluni.