Narsami raajaleriffup matuneqarnissaa aalajangiusimavaat
Narsami Royal Greenlandip raajaleriffiani sulisut 70-it holdinut marlunnut avillutik, ulloq unnuarlu raajarniutit tallimat tulaassugaat naammassiniarlugit sullipput. Taamakkaluartoq Royal Greenlandimi aqutsisut aalajangiusimavaat, juulip aallaqqaataani raajanik tulaassuineq unissasoq.
Narsami raajalerineq ullut 14-it qaangiuppata taamaatinneqassaaq, ukiut pingasut kingulliit 20 mio koruunit sinnerlugit fabrikki amigartooruteqarsimammat.
Kiista P. Isaksen, Narsap borgmesteria oqarpoq, Naalakkersuisunit Royal Greenlandillu aqutsisuinit Narsaq suusupagineqartoq.
-Paasisinnaavara ukiuni pingasuni amigartooruteqarnerartut, kisianni paasisinnaanngisara uaniippoq, siorna maajip qaammataata missaani sivisoorujussuarmik maani fabrikkerput Narsami suliarineqarpoq. Amigartoorutit taakkua iluaniinnginnerpat? Nutarteriffigalugu aningaasartuutit atorneqarsimasut. Aamma paasisinnaanngilara taamatut amigartooruteqarlutik ingerlasimappata, taava sooq siunissaqartutut paasisimanngikkunikku nutarterpaat?
Fabrikki 12 mio koruunit nalinginut iluarsaanneqarsimasoq pillugu siulersuisut siulittaasuat Paaviaaraq Heilmann oqaaseqarumanngimmat, Royal Greenlandip pisortaanut Henrik Leth-imut paasiniaraluarparput pissarsiarinaguli.
Kiista P. Isaksenip Aalisarnermut Piniarnermullu Naalakkersuisoq Finn Karlsen ilanngullugu saassuppaa, taanna apriilimi Kujataata Radioanut oqarpoq, Naalakkersuisut kissaatiginngikkaat Narsami raajaleriffiup unitsinneqarnissaa, aatsaat akilersinnaanngitsutut nalilerneqarpat. Taamaattumik Finn Karlsen aperaarput, ullumikkut qulariunnaarsimaneraa Narsami raajaleriffiup amigartoorluni ingerlalersimanera.
- Akilersinnaanngitsutut oqaatigineqarnera tupaallaatigilaarpara. Amigartooruterujussuanngorsimanera oqaatigineqarmat. Finn Karlsen oqarpoq.
- Tassa malunnarpoq aalisartut tupinnanngitsumik isumalluarfigigaatsit. Illit Aalisarnermut Naalakkersuisutut, aamma kommuniminngaanniit isumalluaraluarput, qanoq ilioriaaseqartariaqassasutit.
Finn Karlsen ima akivoq;
- Tassa taanna aamma tupiginngilluinnarpara aamma eqqarsaateqartoqassappat aalisartut akornanni taama eqqarsaateqartoqassappat, aamma attaveqarluarfigisarakkit, kisianni tassa Naalakkersuisunut eqqartorusullugu qaqinnikuugaluarpara. Kisianni ima oqarput, tassa Naalakkersuisup susassaqartup taanna suliarissagaa. Taamaattumik Suliffissuaqarnermut susassaqartoq oqaloqatigaara nassuaateqqissaarlugu, aamma taqqavunnarniarpoq.
Inuussutissarsiornermut Suliffissuaqarnermullu Naalakkersuisoq Siverth K. Heilmann, maanna Norge-miittoq oqarpoq, aalajangiusimagitsik juulip aallaqqaataani Narsamut raajanik tulaassineq unissasoq. Kisianni Royal Greenland-ip kilisaataataa ataaseq aalisakkanik ulluni makkunani kilisakkiartortoq Narsamut tulaassugassanik.