IA-p Inussummut ilaasortanngornissani piffissaasorinngilaa

Namminersulivinnissaq pillugu suliniaqatigiiffimmut Inussuk-mut IA-p ilaasortanngorusunnginnerminut partiip marloqiusamik sulinissaa pinaveersaarniarpaa. Inuit Ataqatigiit siulersuisuunerisa inatsisartunilu ilaasortaatitaasa aasaanerani ataatsimeeqqammersut aalajangernerat, siulittaasup tulliata Kuupik Kleistip ima tunngavilersorpaa.

- Kattuffiup suliniaqatigiiffimmut Inussummut ilaasortanngunnginnissaannut aalajangernermut pissutaavoq isumaqatatta marloqiusamik sulinissarput pisariaqanngitsoq aammalu taassuma saniatigut ilaasortagut ataasiakkaat IA-mi suleqataasut ilaasrotaasullu kajumissaarlutigit namminersulerniarnermut sulianut tamanut peqataaqqullugit aammalu tapersersueqqullugit, kisianilu kattuffik nammineq peqatigiiffimmut ilaasortaarusunngitsoq.

Kuupik Kleist Folketingimi ilaasortatut Lars-Emil Johansen peqatigalugu Atlantikup Avannaani Suleqatigiiffik sinnerlugu Inussummut ilaasortaapput. Ilaasortaanertillu tunngavigalugu Kuupik Kleist IA-p aamma ilaasortanngornissaa qaammatip ataatsip matuma siornagut kajumissaarutigigaluarpaa. Siulersuisuunerilli inatsisartunilu ilaasortaatitat amerlanerussuteqartut ilaasortanngornissaq piffissaasorinngilaat.

- Una isumaqatigilluinnarparput inuit akornanni pikialaarfimmik ingerlatsinissaq namminersulerniarnermi iluaqutaassasoq, kisianni partiitut kattuffittullu naalakkeruisuni inatsisartunilu suleqataasutut Danmarkip nunattalu akornanni ataatsimiitiliarsuarmi suleqataaniarluta akuersinikuuvugut tassanilu suliami nunatta namminersulernissaa, tassa namminersulivinneruinngitsoq, siullermik anguniassallugu akuerseqataanikuulluta, taamaattumik taanna suliassaq naammassiniaqqaassavarputm taannalu naammassippat alloriarneq tulleq aallariarfigissallugu.

Kuupik Kleist Narsarminngaanniit, Naamminersorneq pillugu isumalioqatigiissitat danskit kalaallillu naalakkersuinikkut suliallit suleqatigiiffiata ataatsimiinnerani peqataasoq, oqarpoq.