Kirkukimi qaartartumeerinerit arlallit

Ataqatigiikkunartunik arfineq-marloriarluni Irakip avannarpasissuani uuliaqarfissuarmi, Kirkukimi, qaartartut atorlugit ullaaq saassussisoqarmat inuit ikinnerpaamik 24-t toqutaapput.

Peqqarniisaartartut al-Qaedakkut pisortaata, Abu Musab al-Zarqawip, amerikamiut sakkutuuinit sapaatip akunnerani kingullermi toqutaasup, taartissaa al-Qaedakkunnit ippassaq toqqarneqareersorlu, aattaqaqisumik saassussineq ullaaq manna pivoq.

al-Zarqawip toqutaanera imminuutigaluni qaartartumeerinernik niaquiinernillu akiniarniarlugu peqqarniisaartartut uppernarsareerpaat.

Politiip nuimasup angerlarsimaffiata silataani biili qaartinneqarpoq. Politeeq qaartartumeerinermi aqqunarpoq paarsisualu ataaseq toqutaalluni.

Politiit amerikamiullu sakkutuui pinerliiffimmut takkummata qaartartoq aqquserngup sinaani qaartussiarineqarsimasoq aamma qaarpoq, inuinnaat, tassa sakkutuujunngitsut, qulit tassani toqutaapput, allat aqqanillit ikiligaallutik.

Imminuutigaluni qaartartumeeriniaq biilimiittoq, Kirkukimi politeeqarfimmik saassussissalluni utaqqimaartoq, isumannaallisaanermut nakkutilliisunit aallaarsarineqarpoq. Qaartartoq qaartinniakkani taassuma iluatsippaa, imminorpoq politiit marluk aamma toqutaapput, inuinnaat qulit aqqunarlutik.

Angut alla kurderit partiivisa, Irakip præsidentianit, Jalal Talabanimit, siulittaasuuffigineqartup, silataani imminuutigaluni aamma qaartartumeerivoq. Inuit marluk tassani aqqunarput.