Uuttortaat ikkarlippoq
Kangilinnguani umiarsuaaqqat uuttortaasartut ilaat, SKA 11, qaammatip ataatsip matuma siorna ikkarleqqariarluni kivivoq.
SKA 12 sapaatip-akunnerata naanerani aamma ikkarlippoq.
Immakkut ikkattuaqqakkoortilluni umiarsuaaraq ikkarlippoq. Maleruagassat naapertorlugit immap itissusaanik alapernaarsuisussamik umiarsuaaqqap siuatungaaniittoqaraluartoq SKA 12 kujaamigut ikkarlippoq.
Taamaasinerani qujanartumik ulikkiartulereersimavoq, umiarsuaararlu allanik ajoqusersimanersoq inuttat misissorpaat, annanniullu pullattagaq aqqariarlugu imaq umiarsuaaraq kaajallallugu itissusersiorneqarpoq.
Nalunaaquttap akunnerata aappaa avillugu ikkarleqqareerluni SKA 12 kaanngarsinnaanngorpoq, ikiorsertariaqaranilu Nuummut ingerlaqqissinnaasimalluni.
SKA 12-ili ajoqusinngitsuuinngilaq. Aqqartartunit misissorneqareersorlu paasineqarpoq umiarsuaaqqap glasfiberitaa iluarsiniarlugu qaqinneqarluni panerseqqissaarneqartariaqartoq.