Pinngortitap nukinginik nukissiuutillu atorluarneqarnerunissaanut atugassanik Norgemiut aningaasaannik koruuninik 20 milliardinik Norge aningaasaliisimasoq, nutaarsiassaqartitsivik Ritzau tusarliussivoq.
- Naalagaaffittut nukissiuutinik atorluaasutut Norgep siuttoorusunnera taamaalilluni uppernarsarneqarpoq, Norgemiut uuliaqarnermut nukissiuuteqarnermullu ministeriat, Odd Roger Enoksen, Norgemiut pilersaarusiaannik saqqummiussinermi ullumi oqarpoq.
Norgemiut aningaasaat koruunit 10 milliardit aappaagu ukioq 2007-imi atugassatut immikkoortinneqassapput, 10 milliardi koruunillu 2009-mi atugassatut immikkoortinneqassallutik.
Pinngortitap nukiinik atuilluni nukissiuutit nukissiuutaareersullu inerisarneqarnissaannut ukiumut norgemiut aningaasaat 800 millioni koruunit pilersaarut naapertorlugu atorneqartassapput.
Norgemi silaannaap kuldioxideqarneranik misissuinermi kuldioxideqangaatsiartoq paasineqarpoq.
Norgemi innuttaasut uuliamik atuinerujussuisa kingunerissanik, Kyotomi 2005-imi isumaqatigiissut naapertorlugu kuldioxideqarnissaanut killissarititaasoq procentinik qulingiluanik qaangerlugu Norgemi kuldioxideqarsimavoq. Nunarsuarmi uuliamik avammut tunisisartut annerpaartaasa pingajuattut Norge inissisimavoq.