Persuttaanerit Nunavummi ingasaqaat

Inoqutigiit amerliartortillugit persuttaanerit, imminornerit angerlarsimaffinnilu eqqissiviilliornerit amerliartortartut, Nunavummi illoqarfiit ilaanni, Cape Dorsetimi, misissuinermi paasineqarpoq.

Inoqutigiit tallimat 13-illu akornanni amerlassuseqaraangata pinerluttuliortoqartarnersoq ilisimatuunit misissuivigineqarsimavoq. Inoqutigiit amerlassusaat pinerluttuliornerillu imminnut atassuteqarluinnartut misissuinermi paasineqarpoq, Torontomi aviisi, Globe and Mail, allappoq.

Nunavummi pinerluttartut amerlasoorujussuupput,

Canadap sinnerani pinerluttarnernut naleqqiullugu qulingiluariaammik amerlanerullutik, agguaqatigiisillugulu imminortarnerit 13-eriaammik amerlanerullutik.

Amerlanerusunik inissialiortitertoqarneratigut ajornartorsiutit amerlanersaat qaangerneqarsinnaagaluartut, inissaaleqinerup iluarsiiviginissaa ungasippasippoq. Cape Dorsetimi initaarniaraanni ukiut marluk pingasulluunniit utaqqisoqartarpoq.