Ilulissani aallaasersortoq
Ilulissani innuttaasut arlallit tallimanngormat unnukkut politiinut siarngupput angut illoqarfiup ilaani inissiaqarfiup eqqaani sumut tamaanga eqqarnerarlugu tamatuma kingorna politiit tamarmiullutik seqqortaarfimmukarput.
Politiit takkummata angut orniguffigisamiissimanngilaq politiillu takusinnaasimavaat inissiap aalajangersimasup pingasunik inullip tungaanut pingasoriarluni eqqartoqarsimasoq. Inissiamiittut arlaannaalluunniit eqqorneqarsimanngilaq.
Imerniartarfimmi unnuk taanna siusinnerusukkut eqqissiviilliortoqarmat angut alla politiit naammattoorsimavaat. Imerniartarfimmi angutip angut puujaasamik niaquagut milorsimavaa angullu milortissimasoq politiit orniguffiani inissiamiittoq naammattoorpaat.
Politiit pisut assigiinngitsut taakku marluk imminnut atasut paasisimavaat arfininngormallu ullaaralaaq angut ippassaammat milortittoq tigusarisimavaat – milortereernermi kingorna inissiap tungaanut eqqarluni akiniaasimammat.
Angutit taakku marluk tigusarineqareerput.
Angut milorsisoq persuttaasimasutut unnerluutigineqarluni sapaatip-akunnerini marlunni tigummigallagaavoq. Taanna siusinnerusukkut persuttaasimasutut pineqaatissineqarsimavoq. Angut inissiap tungaanut eqqarsimasoq sapaatip-akunnerini pingasuni tigummigallagaassaaq.