Illuatungiliuttut aggersarneqarsimannginnertik uparuarpaat
Qaanaami innuttaasunik marlunngormat ataatsimiisitsineq pisariaqarsimava pisariaqarsimanngilaluunniit. Apeqqut taanna politikerit akornanni oqallissutaalerpoq. Qaanaap illoqarfiani innuttaasut 600-t akornanni qulit peqataanerat borgmesterip pitsaasutut isigigaa, illuatungiliuttut uparuaapput, oqarlutik qaaqquneqarsimanatilluunniit.
-Na’aa peqataanngitsoorpunga, nalunaarfigineqannginnatta. Uanga tusaanngitsoorakku radio. Tamatta malinnaasorsuuffigisannginnatsigu aamma illumi isersimaannartuunnginnatta, silami sulisarlutalu pigatta.
Jens Danielsen, Siumut sinnerlugu kommunalbestyrelsemi ilaasortaasoq taama oqarpoq.
-Taamaattoqanngilaq, siumut ilisimatitsimatitsereerluta ataatsimiisitsivugut, borgmester Johanne H. Nielsen oqarpoq nangillunilu.
-Sisamanngorneq tallimanngornerlu Siumukkut siulittaasuat nalunaarfiginikuuarput marlunngornikkut innuttaasunut paasisitsiniutigissallugu. Naluakka suna peqqutigisimaneraat takkutinnginnerminnut.
Borgmesteri isumaqarportaaq innuttaasunit taperserneqarluarluni.
-Tapersersorluarneqarnertut taasariaqarami. Eqqarsaatigineqartariaqarpoq pinsip aappaata aqagorimmagu ippassaanianilu qeqartoqarnikuulluni. Taamaammat naammagisimaarpara inuit qulit takkunnerat.
-Uanga kissaatigissagaluarpara tamakkiisumik misissuineq naammassippat saqqummiussigutta. Innuttaasut pilersaarusioqatigalugillu ikioqatigiilluta ingerlariaqqinnissatsinnut tunngavissaqassagatta, aatsaalli inerneq tamakkiisoq paasigutsigu.
Qaanaap kommuneani naatsorsuutit qanorpiaq inerneqarnissaat suli ilisimaneqanngillat, naatsorsuutinik suliarinnikkiartortoq angerlarallarsimammat.
-Ulluni makkunani Namminersornerullutik Oqartussat nakkutilliisoqarfillu aqqutigalugit qanoq Qaanaap kommuneanut pitsaanerusumik iliuuseqarnissarput. Suliniutigineqarpoq innuttaasunik eqquinaveersaarluta pissagatta.
Qaanaami borgmesteri Johanne H. Nielsen taama oqarpoq. Naatsorsuuserisup kommunalbestyrelsemut ilimasaarutigisimavaa naatsorsuutit juulip qeqqata missaani naammassiumaartut.